Desa Sepang

Ring sajeroning nglestariang tur nincapang kayun antuk tetamian para leluhur ring Bali lan ngrajegang kebudayaan Bali, Guru Wisesa ring Bali sampun ngamedalang Peraturan No. 79 lan 80 Warsa 2018 sane madaging indik ngajegang basa, aksara lan sastra Bali tur mabasa lan ngangge busana adat Bali nyabran rahina wrespati.

Lian ring punika, ring bulan Februari taler kajudi pinaka “Bulan Bahasa Bali” olih Pemerintah Provinsi Bali antuk ngmargiang parikrama-parikrama sane mabuat antuk ngrajegang kebudayaan Bali minakadi parikrama ngawit saking Desa, Kecamatan, Kabupaten, lan Provinsi Bali.

Pinaka Desa Adat sane kantun rumasuk ring desa Bali Aga, Desa Adat Sepang, Kecamatan Busungbiu, Buleleng sayaga nyokong tur sampun nglaksanayang  makudang-kudang parikrama manut Pergub 79 lan 80 Warsa 2018 tur parikrama ring sajeroning pamargin bulan bahasa Bali kaping III.

Ring rahina sukra, wuku Kulantir (Sasih Kasanga) tanggal, 26 Februari 2021, Desa Adat Sepang nglaksanayang makudang-kudang wimbakara ring sajeroning nguningin Bulan Bahasa Bali sane maunteng “Wana Kerthi-Sabdaning taru Mahottama”, minakadi:

1. Wimbakara Nyurat Aksara Bali.

Wimbakara puniki kamiletin olih sisia SD ring sajebag Desa Adat Sepang sane akehnyane 10 sisia tur sampun kajudi olih para kepala-kepala sekolah antuk ngangganin soang-soang SD.

2. Wimbakara Ngwacen Aksara Bali.

Wimbakara puniki kamiletin olih daa truna ring wewidangan Desa Adat Sepang sane mayusa ngawit 14 nyantos 20 tahun (10 pamilet).

Bendesa Adat Sepang, I Made Parmayasa ngraosang, “Pamargin bulan bahasa Bali, yadiastun ring sajeroning kawenten gering Covid-19 kadi mangkin patut kalaksanayang, santukan indik ngrajegang Budaya Bali tan wenten surud-surudnyane, nanging pamargin parikrama ipun patut nglaksanayang protokol kesehatan minakadi: ngangge masker, ngwacikin tangan ring toyane ngecor, tur nyaga jarak.”

Ring sajeroing pamargin parikrama punika karauhin olih:

1. Camat Busungbiu
2. Korwil Pendidikan
3. MDA Kec. Busungbiu
4. Perbekel Sepang & BPD
5. Bendesa Adat Sepang & Prajuru
6. Penyuluh Bahasa Bali
7. Kepala Sekolah Dasar sajebag desa Adat Sepang
8. Para Panureksa Saking Kecamatan
9. Manggala Prawartaka
10. Para Pamilet

Sausan parikrama kalaksanayang, wenten taler sane ngamolihin jayanti, inggih punika :

1. WIMBAKARA NYURAT AKSARA BALI SD,

-JAYANTI I

Dsk. Kompyang Citrayani (SDN.1 SEPANG)

-JAYANTI II

Putu Putri Adelia Paramita (SDN.2 SEPANG KELOD)

-JAYANTI III

Kadek Risma Aripta (SDN.2 SEPANG)

2. WIMBAKARA NGWACEN AKSARA BALI

- JAYANTI I

Sang Ayu Pebriantini (Sisia SMPN.3 Busungbiu)

- JAYANTI II

Kadek Anggun Fridayani (Sisia SMPN.3 Busungbiu)

- JAYANTI III

Kadek Riska Indra Putra (Sisia SMPN.3 Busungbiu)

Gatra puniki kasurat olih: Penyuluh Bahasa Bali Kecamatan Busungbiu, Ketut Mariasa, S.Pd.