Desa Sepang

Silih sinunggil program saking Pemerintah Provinsi Bali indik ngutsahayang kelestarian seni lan budaya Bali mangda tetep ajeg inggian punika kalaksanayang Pacentokan Subak ring Subak sajebag Bali.

Pacentokan Subak tingkat Kabupaten Buleleng ring rahina mangkin Wrehaspati Umanis Ugu (13/09) kalaksanayang panureksaan ring Subak Gunung Urip magenah ring Banjar Adat Sepang, Desa Sepang, sane pinaka angga Subak saking Kecamatan Busungbiu katureksain olih dane tim manggala saking Kabupaten Buleleng, minakadi :

1. Tim saking Dinas Kebudayaan
2. Tim saking Dinas Pertanian
3. Tim saking Dinas Pariwisata, msl.

Sambrama wacana saking Bapak Bupati Buleleng Putu Agus Suradnyana, ST sane kaangganin olih Kepala Dinas Kebudayaan Kabupaten Buleleng inggih punika Bapak Drs. Gede Komang, M.Si nguningayang ring sajeroning pacentokan Subak puniki mangda ngukuhang kawigunan sane wenten ring wawidangan Subak punika miwah majalaran antuk Tri Hita Karana (Prahyangan, Pawongan, lan Palemahan).

Makudang-kudang panureksaan sane kalaksanayang ring sajeroning pacentokan punika, minakadi :

1. Administrasi ring soang-soang Baga
2. Tata Busana
3. Tata Linggih
4. Tata Wicara
5. Tata Boga

Pamargin pacentokan puniki kamiletin olih tim panureksa saking Kabupaten, Bapak Camat Busungbiu Drs. Made Supartawan, M.M sareng tim Kecamatan, Perbekel Sepang I Putu Agung Mahardika lan perangkat nyane, Kelian miwah Krama Subak Gunung Urip, PKK Desa Sepang, Sekaa Truna lan Penyuluh Bahasa Bali Kecamatan Busungbiu.

Panureksan puniki kalakasanayang ngawit jam 09.00 semeng nyantos puput.

Malarapan antuk panureksan pacentokan Subak puniki, sumangdenya ikrama maka sami prasida ngmargiang swadharma manut Tri Hita Karana taler sane kaaptiang antuk mikolihang daging-daging nyane.

Artikel puniki kasurat olih Penyuluh Bahasa Bali Desa Sepang Ketut Mariasa, S.Pd.